ek-dam khushk mira dida-e-tar hai ki nahin
majare se mire tujh ko bhi khabar hai ki nahin
yuun to uthte hai mire dil se hazaron naale
lekin in khana-kharabon men asar hai ki nahin
haal mera tujhe be-dard nahin gar bavar
dekh le aa ke ki ab nau-e-digar hai ki nahin
mere ghar kyunki tu aave ki gali-kuchon men
tere mushtaq kahan aur kidhar hai ki nahin
tujh men bu paai na mutlaq kahin jinsiyyat ki
nasl-e-adam se tu ai shokh pisar hai ki nahin
bul-havas dil ko kar apne zara bas men ‘hasrat’
mard-e-be-sabr tujhe kuchh bhi jigar hai ki nahin
Leave a Reply