ik hava aisi chali bagule bhi kaale ho ga.e
chand ko sardi lagi suraj ko chhale ho ga.e
maz.habi atish ne bachpan ki jala di dosti
ham bhi ka.aba ban ga.e tum bhi shivale ho ga.e
hausla chhune ka tha bachpan men tujh ko asman
barson teri samt ik patthar uchhale ho ga.e
hijr ki daulat ne mala-mal mujh ko kar diya
baal chandi ke hue sone ke chhale ho ga.e
aire-ghaire natthu-ḳhaire paḌh rahe hain chehre ab
chehre chehre na hue goya risale ho ga.e
daagh suraj ki hukumat par bhi kuchh to lag gaya
kuchh ujale jab andheron ke nivale ho ga.e
a.inon par pattharon ke qatl ka ilzam kyuun
aa.ine a.ine na hon jaise bhale ho ga.e
dekh lete tum bhi apne is zamin ke ‘chand’ ko
itni jaldi asman ke kyuun havale ho ga.e
Leave a Reply