Poet
vo ek shaḳhs jo ham se kabhi mila bhi nahin
hamare saath hai aur ham se vo juda bhi nahin
qalam uThao to kaghaz se vo ubharta hai
dil-o-dimagh se ye rabt TuTta bhi nahin
saje to kaise saje anjuman ḳhayalon ki
vo bada-kash bhi nahin ab vo mai-kada bhi nahin
baghair barse ghaTa.en guzar ga.iin ab ke
yunhi chala gaya mausam ne kuchh kaha bhi nahin
vo samne hain magar dil bujha bujha sa hai
shikayaten bhi nahin arz-e-mudda.a bhi nahin
har ek tir-e-sitam hans ke sah liya dil par
ḳhafa vo phir bhi hain ham ne to kuchh kaha bhi nahin
gharib-e-shahr hain phirte hain ajnabi ki tarah
koi rafiq nahin koi ashna bhi nahin
huzur aap ne be-kar pher li ankhen
bura sahi vo magar is qadar bura bhi nahin
Leave a Reply