Razi Akhtar Shauq
kaise is shahr men rahna hoga
haa.e vo shaḳhs ki mujh sa hoga
rang bikhrenge jo main bikhrunga
tu jo bikhrega to zarra hoga
ḳhushk ankhon se isi soch men huun
abr is baar bhi barsa hoga
ab bhi pahron hai yahi soch mujhe
vo mujhe chhoḌ ke tanha hoga
vo badan ḳhvab sa lagta hai mujhe
jo kisi ne bhi na dekha hoga
ye taghayyur ki hava hai pyare
ab jahan phuul hain sahra hoga
dekhna tum ki yahi kunj-e-bahar
phir jo guzroge to suuna hoga
na ye chehre na ye mele honge
na koi dost kisi ka hoga
aisa badlega sitamgar mausam
ḳhuun shaḳhon se Tapakta hoga
na kisi sar men mohabbat ka junun
na kisi dil men ye sauda hoga
husn majbur tah-e-dam-e-havas
ishq mahrum-e-nazara hoga
ham ne ghar apna jalaya hai ki ‘shauq’
shahr men kuchh to ujala hoga
Leave a Reply