Zalzalon Ne Kiya Yun Shahr Ko Mismar Ki Bas

zalzalon ne kiya yuun shahr ko mismar ki bas

chiḳh uThe ḳhauf se bam-o-dar-o-divar ki bas

barishen le ga.i hain saara asasa mera

mehrban itna hua abr-e-guhar-bar ki bas

ab kisi dil men nahin mimbar-o-mehrab ka ḳhabt

aise badnam hue jubba-o-dastar ki bas

itni mai bhi na mili honT zara tar karte

apni taqdir pe vo ro.e hain mai-ḳhvar ki bas

shahr-e-taḳhrib men kya ḳhvahish ta.amir karen

aise taraj hue kucha-o-bazar ki bas

ab ke ḳhurshid ne barsa.i hai vo tariki

sar-barahna nikal aa.i hai shab-e-tar ki bas

zulm vo zulm ajal DhunDhti phirti hai panah

sabr vo sabr ki sharminda hai azar ki bas

yar-o-aghyar ne dekha hai ta.ajjub se bahut

‘mohsin’-ehsan pe thi vo tiron ki bauchhar ki bas