sarsabz ye jangal chahat ka vo dasht-e-vafa hai viran bhi
hai dil ko sukun bhi dekh ke ye aur zehn-e-rasa hai hairan bhi
ye bhi hai qarina ik shayad hasti men tavazun rakhne ka
kuchh raaz ayaan kar logon par kuchh haal magar rakh pinhan bhi
ik zarb ana ne zer-o-zabar kar Daala mohabbat ka mehvar
ab us se panah rab chahen the jis pe kabhi ham nazan bhi
is daur-e-zehanat men jab jab dastur-e-aman par baat hui
aaya hai kaTahre men aksar tab saath hamare yazdan bhi
ik lahza sitam ik lamha karam ham par hai ye ehsan un ka sada
raazi bhi huun ik saa.at men magar ho jaate hain pal men nalan bhi
hai aql samajhne se qasir pahlu ye tamaddun ka ab tak
malbus jahan hain mard bahut aurat hai vahin par uryan bhi
apna to nahin kuchh logon ko ye dekh ke hairani hai bahut
hain jis se gile-shikve bhi hamen rahte hain usi par nazan bhi
sha.ir hain amal ke maidan se kuchh duur to us men hairat kyuun
ghazlon ki zaminon par un ko dekhoge bahut sargardan bhi
us se bhi pata chalta hai ki haan ḳhallaq-e-do-alam hai koi
har shai hai alag pahchan liye ik nazm hai sab men yaksan bhi
ab ham men nahin vo josh-e-junun us men bhi nahin vo baat ki jo
rahat ka sabab the dil ke liye janan nahin zikr-e-janan bhi
qismat ke andhere men bhi rahi ankhon men miri ik kahkashan
tarik nahin kar paa.e kabhi ḳhvabon ko savad-e-zindan bhi
nafrat se mohabbat se aksar ham ne hi likhi taqdir tiri
ham ne hi zamin-e-gul tujh ko jannat bhi kiya aur viran bhi
takrar-e-sitamgar se behtar ruḳhsat lo yahan se ‘at.har’-ji
ye kaam to tum kar sakte ho ye kaam lage hai asan bhi
Leave a Reply