kitab-e-dil ke varaq jo ulaT ke dekhta hai
vo ka.enat ko auron ko haT ke dekhta hai
agar nahin hai bichhaḌne ka ranj kuchh bhi use
vo baar baar mujhe kyuun palaT ke dekhta hai
nadi baḌhi ho ki sukhi har ek surat men
kinara apne hi paani se haT ke dekhta hai
kisi ko tirgi pagal na kar sake jab tak
kahan charagh ki lau se palaT ke dekhta hai
na ho sakenge kabhi us ke zehn-o-dil raushan
varaq varaq jo kitabon ko raT ke dekhta hai
usi pe khulti hain duniya ki vus.aten ‘shahid’
jo apni zaat men har pal simaT ke dekhta hai
Leave a Reply