Shahar KHamosh Hai Sab Neza-O-KHanjar Chup Hain

shahar ḳhāmosh hai sab neza-o-ḳhanjar chup haiñ

kaisī uftād paḌī hai ki sitamgar chup haiñ

ḳhuuñ kā sailāb thā jo sar se abhī guzrā hai

bām-o-dar ab bhī sisakte haiñ magar ghar chup haiñ

chār-sū dasht meñ phailā hai udāsī kā dhuāñ

phuul sahme haiñ havā Thahrī hai manzar chup haiñ

mutma.in koī nahīñ nāma-e-a.amāl se aaj

muskurātā hai ḳhudā saare payambar chup haiñ

lauT ke aatī nahīñ ab to sadā-e-gumbad

chup haiñ sab dair-o-haram masnad-o-mimbar chup haiñ

maiñ jo ḳhāmosh thā ik shor thā har mahfil meñ

merī goyā.ī par ab saare suḳhnavar chup haiñ

Leave a Comment