shahar ḳhamosh hai sab neza-o-ḳhanjar chup hain
kaisi uftad paḌi hai ki sitamgar chup hain
ḳhuun ka sailab tha jo sar se abhi guzra hai
bam-o-dar ab bhi sisakte hain magar ghar chup hain
char-su dasht men phaila hai udasi ka dhuan
phuul sahme hain hava Thahri hai manzar chup hain
mutma.in koi nahin nama-e-a.amal se aaj
muskurata hai ḳhuda saare payambar chup hain
lauT ke aati nahin ab to sada-e-gumbad
chup hain sab dair-o-haram masnad-o-mimbar chup hain
main jo ḳhamosh tha ik shor tha har mahfil men
meri goya.i par ab saare suḳhnavar chup hain
Leave a Reply