harf-e-kun shah-e-rag-e-hu men gum hai
ik jahan zauq-e-numu men gum hai
apne hi husn ka akkas hai husn
aa.ina a.ina-ru men gum hai
kaif-amez hai kaifiyyat-e-hal
nashsha-e-mai ki subu men gum hai
dard chiḳh uThta hai siine men koi
zaḳhm jaise ki lahu men gum hai
tiir mat dekh mire zaḳhm ko dekh
yar-e-yar apna adu men gum hai
khol mat band-e-qaba rahne de
chak-e-daman rafu men gum hai
nafa-e-ahu-e-tatar hai ishq
bu-e-gul apni hi bu men gum hai
ḳhaak uḌti hai sar-e-sahil jo
tishnagi nahr-e-gulu men gum hai
ye bhi kya ḳhud hai ki ḳhud men bhi nahin
ye bhi kya main hai ki tu men gum hai
mast huun apni ana men main bhi
aur vo apni hi ḳhu men gum he
Leave a Reply