Aziz Warsi
jalva-e-dost kisi vaqt bhi ru-posh nahin
haa.e mahrumi-e-qismat ki hamen hosh nahin
aap ehsan ke andaz to sikhen pahle
fitrat-e-ishq bhi ehsan-faramosh nahin
sirf vo log hi divana samajhte hain mujhe
aaj is daur men apna bhi jinhen hosh nahin
vo miri bada-parasti ko abhi kya jaane
jo miri tarah abhi mai-kada-bar-dosh nahin
jaam uThata huun tire hukm se mahfil men mudam
main bala-nosh nahin huun main bala-nosh nahin
saqi-e-bazm tiri mast-nigahon ka asar
dil pe kis vaqt hua tha ye mujhe hosh nahin
vo bhi kahte hain mujhe main jinhen kahta huun ‘aziz’
hosh ab un ko nahin hai ki mujhe hosh nahin
Leave a Reply