Dub Kar Par Utar Gae Hain Hum

Naresh Kumar Shad

Duub kar paar utar ga.e hain ham

log samjhe ki mar ga.e hain ham

ai gham-e-dahr tera kya hoga

ye agar sach hai mar ga.e hain ham

ḳhair-maqdam kiya havadis ne

zindagi men jidhar ga.e hain ham

ya bigaḌ kar ujaḌ ga.e hain log

ya bigaḌ kar sanvar ga.e hain ham

maut ko munh dikha.en kya ya rab

zindagi hi men mar ga.e hain ham

haa.e kya shai hai nashsha-e-mai bhi

farsh se arsh par ga.e hain ham

arzuon ki aag men jal kar

aur bhi kuchh nikhar ga.e hain ham

jab bhi ham ko kiya gaya mahbus

misl-e-nik.hat bikhar ga.e hain ham

shadmani ke rang-mahlon men

‘shad’ ba-chashm-e-tar ga.e hain ham