Dub Kar Par Utar Gae Hain Hum

Duub kar paar utar ga.e haiñ ham

log samjhe ki mar ga.e haiñ ham

ai ġham-e-dahr terā kyā hogā

ye agar sach hai mar ga.e haiñ ham

ḳhair-maqdam kiyā havādis ne

zindagī meñ jidhar ga.e haiñ ham

yā bigaḌ kar ujaḌ ga.e haiñ log

yā bigaḌ kar sañvar ga.e haiñ ham

maut ko muñh dikhā.eñ kyā yā rab

zindagī hī meñ mar ga.e haiñ ham

haa.e kyā shai hai nashsha-e-mai bhī

farsh se arsh par ga.e haiñ ham

ārzūoñ kī aag meñ jal kar

aur bhī kuchh nikhar ga.e haiñ ham

jab bhī ham ko kiyā gayā mahbūs

misl-e-nik.hat bikhar ga.e haiñ ham

shādmānī ke rañg-mahloñ meñ

‘shād’ bā-chashm-e-tar ga.e haiñ ham

Leave a Comment