Anwar Masood
isharaton ki vo sharhen vo tajziya bhi gaya
jo gird-e-matn bana tha vo hashiya bhi gaya
vo dil-ruba se jo sapne the le uḌiin ninden
dhanak-nagar se vo dhundla sa rabta bhi gaya
ajiib lutf tha nadaniyon ke aalam men
samajh men aa.iin to baton ka vo maza bhi gaya
hamen bhi banne sanvarne ka dhyan rahta tha
vo ek shaḳhs ki tha ek a.ina bhii, gaya
baḌa sukun mila aaj us ke milne se
chalo ye dil se tavaqqo.a ka vasvasa bhi gaya
gulon ko dekh ke ab raakh yaad aati hai
ḳhayal ka vo suhana talazima bhi gaya
musafirat pe main teshe ke sang nikla tha
jidhar gaya huun mire saath rasta bhi gaya
hamen to ek nazar nashr kar ga.i ‘anvar’
hamare haath se dil ka musavvada bhi gaya
Leave a Reply