ajab sahra badan par aab ka ib.ham rakkha hai
ye kis ne is samundar ka samundar naam rakkha hai
vahi ik din shahadat dega meri be-gunahi ki
vo jis ne qatl-e-gul ka mere sar ilzam rakkha hai
main tum se puchhta huun jhil-dal ki be-zaban maujo
tah-e-daman chhupa kar tum ne kya paigham rakkha hai
kabhi badal mere angan utarta puchhta main bhi
kuhistan par barasna kis ne tera kaam rakkha hai
raha hoga vo kitna dil ghani dast-e-saḳhi jis ne
junun ki mumlikat ka ek patthar daam rakkha hai
yahi na phuul se bichhḌe to avara hon sahra men
kahun kya kis ne ḳhushbuon ka ye anjam rakha hai
mujhe manzur vo aqdar bhi radd sab karen jin ko
kisi ne soch kar ‘manzur’ mera naam rakha hai
Leave a Reply