shauq jab jur.at-e-iz.har se Dar ja.ega
lafz ḳhud apna gala ghunT ke mar ja.ega
tez-raftar havaon ko ye ehsas kahan
shaḳh se TuTega patta to kidhar ja.ega
ye chamakta hua suraj bhi miri shaam ke ba.ad
raat ke gahre samundar men utar ja.ega
sirf ik ghar ko Dubona hi nahin kaam is ka
ab ye sailab kisi aur ke ghar ja.ega
hain har ik samt yahi log yahi duniya hai
in se bach ke koi jaa.e to kidhar ja.ega
kaam itna to karega ye ubalta hua ḳhuun
saare manzar men mira rang to bhar ja.ega
Leave a Reply