Nazar Pe baiTh Gaya Jo Ghubar Kis Ka Tha

Poet

nazar pe baiTh gaya jo ghubar kis ka tha

dilon se kam na hua jo sharar kis ka tha

na koi shakl thi dil men na lab pe naam koi

tamam umr mujhe intizar kis ka tha

mire liye to vo Thahra na ek pal-bhar ko

na jaane qafila-e-nau-bahar kis ka tha

ye kis ke husn se yadon ki ban ga.i tasvir

dil-a.ine pe sunahra ghubar kis ka tha

paḌe rahenge isi soch men qayamat tak

hamare ba.ad dil-e-be-qarar kis ka tha

ḳhayal-o-ḳhvab ki raton se jo ubharta hai

vo ek nuur badan ka nikhar kis ka tha

vo adh-khula sa daricha vo chaah ki ḳhushbu

mira nahin tha to phir intizar kis ka tha

ye kis ne shor-e-salasil ko naghmagi de hi

rah-e-vafa men qadam baar baar kis ka tha

tumhare jabr ki ta.id tha mira mansha

samajh men aa na saka iḳhtiyar kis ka tha

ye kis liye su-e-gul bhi nigah jaati thi

tum aa chuke the to phir intizar kis ka tha

miri vafa ka bagula to ek tha lekin

mire siva sar-e-sahra ghubar kis ka tha

bahut dinon se yahi ik saval hai dil men

jo main ne sab ko diya tha vo pyaar kis ka tha

‘munir’ jab bhi chale koi rasta na mila

vajud-e-rahguzar e.atibar kis ka tha