main ne jo kuchh kho diya ab is ko pa sakta nahin
dil se ye ehsas bhi lekin miTa sakta nahin
vo kanar-e-ab baiThe chand ugte dekhna
jhiil ki tah se vo manzar ab uga sakta nahin
sab dar-o-divar us ke lams ke maqruz hain
apne ghar se us ki tasviren miTa sakta nahin
mat milo is se tumhari baat main ne maan li
us ke gham men chaar aansu bhi baha sakta nahin
shahar-bhar men phuul ki chadar bichhana hai mujhe
apne shahzadon ko kanTon par chala sakta nahin
kuchh banana chahta huun aur ban jaata hai kuchh
main ḳhud apne ghar ko naqshe se mila sakta nahin
Leave a Reply