siine men sulagte hue lamhat ka jangal
kis tarah kaTe taron bhari raat ka jangal
haan dast-shanasi pe baḌa naaz tha us ko
dekha na gaya us se mire haat ka jangal
ummid ka ik peḌ ugaa.e nahin ugta
ḳhud-rav hai magar zehn men shub.hat ka jangal
de taqat-e-parvaz ki uupar se guzar ja.un
kyuun raah men haa.il hai miri zaat ka jangal
ḳhvabida hain is men ka.i ayyar darinde
behtar hai ki jal jaa.e ye jazbat ka jangal
kuchh aur masa.il miri janib hue maa.il
kuchh aur hara ho gaya halat ka jangal
tasvir-e-ghazal men se jhalakta hua ‘aslam’
ye shahr-e-suḳhan hai ki ḳhurafat ka jangal
Leave a Reply