Alka Mishra
safar hai dhuup ka is men qayam thoḌi hai
bala hai ishq ye bachchon ka kaam thoḌi hai
kisi ko vasl hai bojhal koi firaq men ḳhush
dilon ke khel men koi nizam thoḌi hai
hamare dil men dhaḌakta hai naam us ka abhi
hai ye shuru-e-mohabbat tamam thoḌi hai
jo ahl-e-ishq hain manzil ka gham nahin karte
ye ḳhaas logon ka rasta hai aam thoḌi hai
ham apne man ki karenge bura lage ki bhala
hamara dil hai tumhara ghulam thoḌi hai
tumhari yaad jo aa.i to aa ga.e milne
vagarna tum se hamen koi kaam thoḌi hai
baḌha jo dard to kaghaz pe ḳhud utar aaya
samajh ke soch ke likkha kalam thoḌi hai
Leave a Reply