chale jaana magar sun lo mire dil men ye hasrat hai
faqat ik baar hi kah do hamen tum se mohabbat hai
ye mausam bhi suhana hai tiri yadon ke mele hain
tire bin ek bhi lamha bita lena qayamat hai
bura kahta hai mujh ko ye zamana main ne maana hai
na jaane kyuun use tujh se nahin koi shikayat hai
achanak yuun jo mujh se bad-guman tu ho gaya hamdam
mujhe lagta hai ye mere raqibon ki shararat hai
nahin koi ḳhata meri vo phir bhi zaḳhm dete hain
main huun bimar-e-ulfat bas dava meri mohabbat hai
rahe kab tak bhala mahtab tanha.i ke aalam men
ki ab to aa bhi ja us ko faqat teri zarurat hai
Leave a Reply