Aks Samastipuri
umr-bhar siine men ik dard daba.e rakkha
ek be-nam se rishte ko nibha.e rakkha
tha mujhe vahm-o-guman ki vo faqat meri hai
aur us ne bhi bharam mera bana.e rakkha
andhiyan sharm se ho jaa.en na paani paani
sar yahi soch ke peḌon ne jhuka.e rakkha
vaise har baat se rakkha use vaqif ham ne
lekin afsana-e-ulfat ko chhupa.e rakkha
ek rishta jise main de na saka koi naam
ek rishta jise ta-umr nibha.e rakkha
kuza-gar tujh ko banana hi nahin tha jab kuchh
kis liye chaak pe ta-umr chaḌha.e rakkha
Leave a Reply