mulaqaton ka aisa silsila rakkha hai tum ne
badan kya ruuh men bhi rat-jaga rakkha hai tum ne
koi asan nahin tha zindagi se kat ke jiina
bahut mushkil dinon men rabta rakkha hai tum ne
ham aise milne valon ko kahan us ki khabar thi
na milne ka bhi koi rasta rakkha hai tum ne
junun ki halaton ka ham ko andaza nahin tha
diye ki shah pe suraj ko bujha rakkha hai tum ne
hava ko habs karna ho to koi tum se sikhe
dariche band darvaza khula rakkha hai tum ne
ab aisa hai ki duniya se ulajhte phir rahe hain
ajab kaifiyaton men mubtila rakkha hai tum ne
khizan jaise hare pedon ko rusva kar rahi hai
suluk aisa hi kuchh ham se rava rakkha hai tum ne
rihai ke liye zanjir pahnai gai thi
asiri ke liye pahra utha rakkha hai tum ne
burida aks larzan hain lahu ki vahshaton men
ye kaisa aina-khana saja rakkha hai tum ne
jahan kirdar gunge dekhne vaale hain andhe
isi manzar se to parda hata rakkha hai tum ne
mohabbat karne vaale ab kahan ja kar milenge
guzargahon ko to maqtal bana rakkha hai tum ne