Meena Naqvi
asan har ek ho ga.i mushkil mire liye
jis din se mohtaram hua qatil mire liye
main vahshaton men dasht-o-bayaban ki ho ga.i
muddat se multamis hai mira dil mire liye
yuun raston se in dinon dilchaspiyan baḌhin
qadmon ki ḳhaak ho ga.i manzil mire liye
asaniyan nazar ko bacha kar chali ga.iin
Thahre rahe tamam masa.il mire liye
avaz mere haq men ye kis ne uTha.i hai
is bhiiḌ men ye kaun hai aadil mire liye
ye aur baat hai ki tujhe kuchh ḳhabar nahin
‘mina’ tira ḳhayal hai kamil mire liye
Leave a Reply