Qissa-E-Husn Nahin Ishq Ki Rudad Nahin

qissa-e-husn nahīñ ishq kī rūdād nahīñ

haif ye bazm tire zikr se ābād nahīñ

morid-e-rañj-o-alam kushta-e-bedād nahīñ

vaa.e bar-aish jahāñ mujh ko ḳhudā yaad nahīñ

ham-safīrān-e-chaman vaah ye pursish ye karam

ab mujhe shikva-e-be-mehrī-e-sayyād nahīñ

maiñ huuñ nāshād-e-azal ḳhair magar hairat hai

ishrat-ābād-e-jahāñ meñ bhī koī shaad nahīñ

qissa-e-jaur-e-falak shikva-e-ayyām-e-zubūñ

ek afsāna hai jis kī koī buniyād nahīñ

sarfaroshān-e-mohabbat pe ḳhudā kī rahmat

mudda.ī sab haiñ magar ek bhī fariyād nahīñ

vaah ai manzar-e-ḳhush-vaqtī-e-manzil qurbāñ

dasht-e-ġhurbat kī masā.ib bhī mujhe yaad nahīñ

maiñ ḳhatāvār magar tere karam ke qurbāñ

ek majbūr to yuuñ mustahiq-e-dād nahīñ

‘rāz’ ye nāma-e-ahsan ye payām-e-izzat

vaa.e taqdīr ki maiñ aaj bhī āzād nahīñ

Leave a Comment