Qissa-E-Husn Nahin Ishq Ki Rudad Nahin

Raz Chandpuri

qissa-e-husn nahin ishq ki rudad nahin

haif ye bazm tire zikr se abad nahin

morid-e-ranj-o-alam kushta-e-bedad nahin

vaa.e bar-aish jahan mujh ko ḳhuda yaad nahin

ham-safiran-e-chaman vaah ye pursish ye karam

ab mujhe shikva-e-be-mehri-e-sayyad nahin

main huun nashad-e-azal ḳhair magar hairat hai

ishrat-abad-e-jahan men bhi koi shaad nahin

qissa-e-jaur-e-falak shikva-e-ayyam-e-zubun

ek afsana hai jis ki koi buniyad nahin

sarfaroshan-e-mohabbat pe ḳhuda ki rahmat

mudda.i sab hain magar ek bhi fariyad nahin

vaah ai manzar-e-ḳhush-vaqti-e-manzil qurban

dasht-e-ghurbat ki masa.ib bhi mujhe yaad nahin

main ḳhatavar magar tere karam ke qurban

ek majbur to yuun mustahiq-e-dad nahin

‘raz’ ye nama-e-ahsan ye payam-e-izzat

vaa.e taqdir ki main aaj bhi azad nahin