Wirasat

duur kisi basti ki

nim-tarik kothari men

ek tang charpai pe

karahat-zada kokh se

ghaib ki madad ko pukarti

aadhi chikh

puure jigar se paar hui to

nannhi chalai

dil baith gae

maan ufuq ke paar

ja chuki thi

rivayat ki qabr men

be-hisi ka kafan pahna ke

use tahzib se dafn kar diya gaya

aziyyat men mubtala zehnon ko

qismat ki goli de kar

sula diya gaya

aur vo nau-maulud bachchi

apni janm-jali maan se

nahin kah paai

dekh

virasat tera khuun piine ke baad

meri ek aur maan

khojne nikal padi hai

Leave a Comment