Hazaron Sal Chalne Ki Saza Hai

hazāroñ saal chalne ki sazā hai

batā ai vaqt terā jurm kyā hai

ujālā kaam par hai pau phaTe se

añdherā chain se soyā huā hai

havā se laḌ rahe bujhte diye ne

hamārā zehn raushan kar diyā hai

vo suraj ke gharāne se hai lekin

falak se chāñdnī barsā rahā hai

badan par raushnī oḌhī hai sab ne

añdherā ruuh tak phailā huā hai

sunā hai aur ik bhūkā bhikārī

ḳhudā kā naam lete mar gayā hai

vahī ham haiñ na.ī shakloñ meñ ‘anjum’

vahī sadiyoñ purānā rāsta hai

Leave a Comment