thiin ik sukut se zahir mohabbaten apni
ab ansuon ne bhi baḳhshen inayaten apni
ki barg-ha-e-ḳhizan dada-jun uḌaa.e hue
kashan kashan liye phirti hain vahshaten apni
sabhi ko shak hai ki ḳhud ham men bevafa.i hai
kahan kahan na hui hain shikayaten apni
chale jahan se the ab aao lauT jaa.en vahin
nikalin rahon ne ham se adavaten apni
kuchh aur kar degi bojhal faza ko ḳhamoshi
chalo ki shor macha.en shararten apni
hamara jo bhi ta.alluq tha us ke dam se tha
lo aaj ḳhatm huiin sab riqabaten apni
Leave a Reply