Nazish Partap Gadhi
dil-e-ḳhulus-gazida ko koi kya jaane
main chahta huun ki duniya mujhe na pahchane
suno na meri shikasta-e-dili ke afsane
ki mere samne toḌe ga.e hain paimane
jo kah raha tha to kuchh bhi suna na duniya ne
jo chup hua huun to banne lage hain afsane
vo gham sameT liye main ne zindagi ke liye
tiri nigah-e-karam bhi jinhen na pahchane
guzar ga.e hain vo lamhe bhi ishq men ai dost
tire baghair bhi jab ḳhush rahe hain divane
ye chandni ye sitare kahan ga.e aḳhir
nazar to ḳhair ga.i hai kisi ko pahunchane
miri hansi men magar zahr ghul gaya ‘nazish’
main chahta tha mira gham koi na pahchane
Leave a Reply