ajab zamane ki gardishen hain ḳhuda hi bas yaad aa raha hai
nazar na jis se milate the ham vahi ab ankhen dikha raha hai
baḌhi hai aapas men bad-gumani maza mohabbat ka aa raha hai
ham us ke dil ko TaTolte hain to ham ko vo aazma raha hai
ghar apna karti hai na-umidi hamare dil men ghazab hai dekhiyo
ye vo makan hai ki jis men barson umidon ka jamghaTa raha hai
badal gaya hai mizaj un ka main apne is jazb-e-dil ke sadqe
vahi shikayat hai ab udhar se idhar jo pahle gila raha hai
kisi ki jab aas TuuT jaa.e to ḳhaak vo aasra laga.e
shikasta dil kar ke mujh ko zalim nigah ab kya mila raha hai
yahan to tark-e-sharab se ḳhud dil-o-jigar phunk rahe hain vaa.iz
suna ke dozaḳh ka zikr-e-nahaq jale ko tu bhi jala raha hai
karun na kyuun husn ka nazara sunun na kyuun ishq ka fasana
isi ka to mashghala tha barson isi ka to valvala raha hai
umiid jab had se baḌh ga.i ho to hasil us ka hai na-umidi
bhala na kyuun yaas daf.atan ho ki muddaton aasra raha hai
mujhe tavaqqo.a ho kya ḳhabar ki zaban hai qasid ki haath bhar ki
lagi hava tak nahin udhar ki abhi se baten bana raha hai
zara yahan jis ne sar uThaya ki us ne nicha use dikhaya
koi bata.e to ye zamana kasi ka bhi ashna raha hai
‘hafiz’ apna kamal tha ye ki jis ke hathon zaval dekha
falak ne jitna hamen baḌhaya ziyada us se ghaTa raha hai
Leave a Reply