manzil-e-shams-o-qamar se guzre
jab tiri rahguzar se guzre
shab ki gaati hui tanha.i men
kitne tufan the jo sar se guzre
vahin patjhaḌ ne paḌav Daala
qafile gul ke jidhar se guzre
har taraf sabt hain qadmon ke nishan
koi kis rahguzar se guzre
kis qadar ḳhud pe hamen pyaar aaya
aaj jab apni nazar se guzre
surḳhi-e-gul se bhi chaunke gul-ruḳh
vo zamane bhi nazar se guzre
dasht-o-sahra ka bhi daman simTa
tere divane jidhar se guzre
ḳhud-nigar ho ga.e ‘rahat’ ham bhi
aaj vo kaash idhar se guzre
Leave a Reply