jo us ne kiya use sila de
maula mujhe sabr ki jaza de
ya mere diye ki lau badha de
ya raat ko subh se mila de
sach huun to mujhe amar bana de
jhuta huun to naqsh sab mita de
ye qaum ajiib ho gai hai
is qaum ko khu-e-ambiya de
utrega na koi asman se
ik aas men dil magar sada de
bachchon ki tarah ye lafz mere
maabud inhen bolna sikha de
dukh dahr ke apne naam likkhun
har dukh mujhe zaat ka maza de
ik mera vajud sun raha hai
ilham jo raat ki hava de
mujh se mira koi milne vaala
bichhda to nahin magar mila de
chehra mujhe apna dekhne ko
ab dast-e-havas men aina de
jis shakhs ne umar-e-hijr kaati
us shakhs ko ek raat kya de
dukhta hai badan ki phir mile vo
mil jaae to ruuh ko dikha de
kya chiiz hai khvahish-e-badan bhi
har baar naya hi zaiqa de
chhune men ye Dar ki mar na jaun
chhu luun to vo zindagi siva de