ahmad-hamesh

Kis Ka Shoala Jal Raha Hai Shoalagi Se Mawara

kis ka shoala jal raha hai shoalagi se mavara

kaun raushan hai bhala is raushni se mavara

jiite ji to kuchh nahin dekha nazar se haan magar

hairaten DhunDa kiye is hairati se mavara

kaun sa aalam hai malik tere aalam men nihan

kaun sajde men chhupa hai bandagi se mavara

koi to batlaega aage kahan mudti hai raah

koi to hogi zamin us malgaji se mavara

baat jiine ki ada tak khub-surat hai magar

zindagi kuchh aur hai is zindagi se mavara

khak-basta phir raha hai kaun si basti men dil

kaun akhir khasta-jan hai khastagi se mavara

ik nagar tarsa hua hai aur sahra hai tavil

aur ik naddi hai koi tishnagi se mavara

kab se khali haath hai yaan ek khilqat ishq ki

ham bhi ho jaenge ek din bebasi se mavara

in faravan neamaton aur barkaton ke bavajud

koi muflis chal diya hai muflisi se mavara

apni duniya men agar phaili hai tariki to kya

din kahin nikla to hoga tirgi se mavara

More Poems

Leave a Comment