Yun to Sada-E-zaKHm baDi Dur Tak Gai

yuun to sada-e-zaḳhm baḌi duur tak ga.i

ik charagar ke shahr men ja kar bhaTak ga.i

ḳhushbu giraft-e-aks men laaya aur us ke baad

main dekhta raha tiri tasvir thak ga.i

gul ko barhana dekh ke jhonka nasim ka

jugnu bujha raha tha ki titli chamak ga.i

main ne paḌha tha chand ko injil ki tarah

aur chandni salib pe aa kar laTak ga.i

roti rahi lipaT ke har ik sang-e-mil se

majbur ho ke shahr ke andar saḌak ga.i

qatil ko aaj sahib-e-ejaz maan kar

divar-e-adl apni jagah se sarak ga.i