tire nigah-e-karam jab bikhar ga.i hogi
kisi gharib ki duniya sanvar ga.i hogi
tujhi ko DhunDhti phirti hain dar-ba-dar ankhen
azal ke roz tujhi par nazar ga.i hogi
sukut-e-saz-e-do-alam suna.i deta hai
tire firaq men duniya Thahar ga.i hogi
sahar ke chahne vaale ka kya hua hoga
ba-nam-e-tira-shabi jab sahar ga.i hogi
vo ik ḳhabar ki jo rusva.iyon ka baa.is thi
hazar rang men vo ik ḳhabar ga.i hogi
sahar ke narm-o-ḳhunuk dudhiya ujalon men
tire jamal ki rangat bikhar ga.i hogi
ye shash-jihat hai tire qatilon ka des to phir
tire ḳhulus ki arthi kidhar ga.i hogi
Leave a Reply