Fatima Wasia Jayasi
aansu hai qimti jo hamari palak men hai
vo baat phir kahan jo faqat ik jhalak men hai
ham bhi usi tarah se zamane ke biich hain
jis tarah se vo ek sitara falak men hai
gamlon men phuul ḳhuub saja.e hain aap ne
lekin vo baat kab jo chaman ki mahak men hai
ham kab ye kah rahe hain nahin artist aap
vo baat to nahin hai jo uupar dhanak men hai
hai kam-libasiyon ki baḌi dhuum aj-kal
lekin ye ghaur kijiye chuḌi khanak men hai
halat itne bigḌe hain duniya ke har taraf
is vaste ‘vasiya’ ka dil bhi kasak men hai
Leave a Reply