dasht tarik tha aur khvab tha kaala mera
raushni deta raha kaan ka baala mera
katna tha mujhe koh-e-shab-e-ghurbat lekin
tuut kar girta raha raah men bhala mera
tujh ko maalum na thi chak-garebani miri
tu ne is dasht men kyon naam nikala mera
atishin rakhti hai yaan garmi-e-raftar mujhe
huun mah-e-khak-nashin gard hai haala mera
la-makan ne mujhe phenka hai makan ki had men
kis se padta hai yahan dekhiye paala mera
manzil-e-ishq na khak-e-shab-e-hijran men mili
jada-e-ranj men khinchta raha naala mera
dast-e-shaffaf pe likhta hai mira naam koi
shakh-e-sarsabz pe khulta hai ujala mera
mujh ko gar kar-e-mohabbat men zara der hui
aa gaya karne koi aur izala mera
paar kar jaae ye shayad kisi din ju-e-khak
jism ko chahiye kuchh aur sambhala mera
shahr-e-maujud dhuan hai mire bujhne se ‘naved’
shahr-e-nabud men rahta hai ujala mera
Leave a Reply