tiri Dagar ko main apni nazar men rakhti huun
hazar phuul tiri rahguzar men rakhti huun
main teri yaad ko anchal men bandh laai huun
tire khayal ko zad-e-safar men rakhti huun
tu ek pal bhi juda mujh se ho nahin sakta
main teri yaad ko sham-o-sahar men rakhti huun
miri vafaon ki garmi se tu bhi pighlega
ik aisa shoala main apne jigar men rakhti huun
mujhe Daraega kaise ye paniyon ka mizaj
main apni kashti hamesha bhanvar men rakhti huun
talash karte ho tum mujh ko chand ke andar
main apne chehre ka partav qamar men rakhti huun
‘iram’ ne sheron se sab ko asiir aise kiya
ki jaise jaadu main apne hunar men rakhti huun