Abad

Ahmad Hamesh

maut kis raah par khadi meri raah dekh rahi hai

abhi abhi main ne hava ki an dekhi chadar men surakh kiya hai

aur bahut uupar ke badalon ko chhalni kar diya hai

zamin bhar ki vo saari mitti

jo an-ginat dafn hone valon

ki kimiya se bani hai

aur charon dishaon men

an-ginat badan jalon ki chitaon ki jo raakh bani hai

kahan le jaegi mujhe

main to ab vo huun hi nahin jo kabhi hua karta tha

ab na to men kabhi sota huun aur na kabhi jagta huun

main na paanv chalta huun na main qadam-sakin huun

maut mere paanv ke bina chal sakti hai

maut mere qadam ke bina sakin ho sakti hai

ab ghilaf-e-zindagi ki koi bhi ek parat rah gai ho

to use zindagi se hata diya jaae

jab uqaab unchi udaan par ho

to us ki aankh men koi sui chubhoi nahin ja sakti

maut ne mujhe uqaab bana diya hai

ya shayad mujhe kisi farishte men tabdil kar diya hai

ab mujhe zamin par ya zamin ki fuzul duniya ki sat.h par dhunda na jaae

main ab kisi ki dastaras men nahin ho