zamanon se dar-e-imkan par rakkhe hue hain
charaghon ki tarah tufan par rakkhe hue hain
fazaon men mahak jalne ki bu phaili hui hai
kisi ne phuul atish-dan par rakkhe hue hain
zara sa bhi guman teri shabahat ka tha jin par
vo sab chehre miri pahchan par rakkhe hue hain
ḳhushi ko DhunDhna mumkin nahin is kaifiyat men
kuchh aise sanehe muskan par rakkhe hue hain
koi teri parastish ki nahin surat nikalti
hazaron kufr ik iman par rakkhe hue hain
shikam-seri se pahle lamha-bhar ko soch lena
hamare ḳhvab dastar-ḳhvan par rakkhe hue hain
kisi ke roz-o-shab bikne ki qimat chand luqme
to kya vo bhi tire ehsan par rakkhe hue hain
Leave a Reply