Safar Mein Ab Bhi Aadatan Sarab Dekhta Hun Main

Poet

safar men ab bhi adatan sarab dekhta huun main

qarib-e-marg zindagi ke ḳhvab dekhta huun main

hava ne harf-e-sada mere zehn se uḌa liya

to ab har ek baat par kitab dekhta huun main

bahar ki savariyon ke ham-rikab kyuun rahe

ḳhizan ka barg-o-bar par itaab dekhta huun main

khaḌa huun nok-e-ḳhar par guman-dar-guman par

khulega kab haqiqaton ka baab dekhta huun main

ajiib us ki sarvari na.i hai shaan har ghaḌi

banon men shahr, shahr men sarab dekhta huun main

nazar-fareb Dhang hain sitamgaron ke rang hain

nigah men qahr haath men gulab dekhta huun main

ghazal se chheḌ-chhaḌ ko gunah janta tha main

magar ab is gunah men savab dekhta huun main

‘suhail’ shaam Dhal ga.i dukan apni baḌh ga.i

zara si raushni hai aur hisab dekhta huun main