Zakia Ghazal
main tere hijr-zada mausamon ki zad men huun
pas-e-ḳhayal tiri qurbaton ki had men huun
main chahti huun ujala miri zamin par ho
main ik diya huun magar raushni ki mad men huun
ye nasl-e-nau mire lahje se muttafiq kab hai
main ik saval huun lekin qubul-o-rad men huun
kashan kashan liye phirti hai justuju koi
ḳhabar nahin ki junun men huun ya ḳhirad men huun
mira hunar mira apna hai musta.ar nahin
main jis qadar bhi jahan bhi huun apne qad men huun
kuduraten hain yahan nafrat-o-adavat hai
magar main phir bhi yahan fikr-e-nek-o-bad men huun
vo dosti men ‘ghazal’ had se gir ga.e lekin
main dushmani ko nibha kar bhi apni had men huun
Leave a Reply