pahle dard-e-dil pe kahte the ki ye kya ho gaya
ab ye kavish hai ki kyuun bimar achchha ho gaya
dil bhi pahlu men kabhi ik chiiz tha yadash-ba-ḳhair
ab ḳhuda jaane kahan jaata raha kya ho gaya
aa ga.e lo vo ayadat ke liye ḳhud aa ga.e
ho gaya bimar dard-e-hijr achchha ho gaya
ek moti sa chamakta hai sar-e-mizhgan-e-naz
auj par kya meri qismat ka sitara ho gaya
ho gaya sab mere shikvon ka javab-e-la-javab
un ka sharma kar ye kah dena tumhen kya ho gaya
kasrtat-e-didar se un ki nigahen jhuk ga.iin
aks mizhgan ka naqab-e-ru-e-zeba ho gaya
sahte sahte jo na sahna tha use bhi sah liya
piite piite zer-e-gham aḳhir gavara ho gaya
aap hi pahle uTha di ru-e-raushan se naqab
aap hi phir puchhte hain chand ko kya ho gaya
raat bhigi ja rahi hai sard aahen ho chalin
chhoḌ ye mad-hoshiyan ‘talib’ savera ho gaya
Leave a Reply