dekhte kya diid ke qabil koi manzar na tha
paanv dharti par na the aur asman sar par na tha
ḳhud hamin ko ḳhud-kushi ka shauq tha charagaro
doston ki astinon men koi ḳhanjar na tha
har paḌav ek shab ke vaste manzil bana
jis ki ḳhatir dar-ba-dar bhaTke hamara ghar na tha
qarz miTTi ka tha miTTi ke havale kar diya
vo jo ham ne dasht ko saunpa hamara sar na tha
barf mausam andhiyan shaḳh-o-shajar kuchh bhi na the
uḌne valon ko magar andoh-e-bal-o-par na tha
gumbad-e-koh-e-nida se bach nikalna tha muhal
raste charon taraf the aur koi dar na tha
main hi sha.ista na Thahra sangsari ka ki aaj
sab uThe hathon men parcham the koi patthar na tha
ham ne nazron se chhua palkon se chuma hai use
log kahte the ki ḳhushbu ka koi paikar na tha
Leave a Reply