Jo Shakhs Tujhko Farishta Dikhai Deta Hai

jo shakhs tujh ko farishta dikhai deta hai

vo aaine se Dara sa dikhai deta hai

kiya tha dafn jise farsh ke tale kal raat

vo aaj chhat se utarta dikhai deta hai

tiri nigah men mumkin hai kuchh atak jaae

mujhe to sirf andhera dikhai deta hai

saval zehn men chubhte hain nashtaron ki tarah

ye khuun bhi mujhe hota dikhai deta hai

khala men Duub chuki hai nigah jab meri

vo puchhte hain tujhe kya dikhai deta hai

nigalta jaata hai chup-chap khushk jangal use

ye aftab to thanDa dikhai deta hai

naqab badlo kuchh aise ki moajiza ho jaae

hujum varna bikharta dikhai deta hai

tumhari yaad ke dariya tamam suukh chale

jahan-tahan mujhe sahra dikhai deta hai

sadaen gunjti rahti hain rat-bhar kis ki

makan vaise to suuna dikhai deta hai

jo ped tum ne lagaya tha mere angan men

vo is baras mujhe girta dikhai deta hai

Leave a Comment