tujh pe donon nisar hain qatil
jan-e-muztar ho ya dil-e-bismil
qahr hai qahr-e-ishq ki manzil
har qadam aag hai na.i mushkil
ho ga.e dekh kar vo a.ina
apni surat pe aap hi maa.il
gham se azad kar diya ham ko
kyon na pir-e-mughan ke hon qaa.il
kis qadar dil-kusha faza hogi
aap jab honge zinat-e-mahfil
adamiyat ko naaz tha jin par
ab vo daana rahe na vo aaqil
chara-sazi mariz-e-ulfat ki
aap ke vaste nahin mushkil
arzuon men mach ga.i halchal
kaun ye yaad aa gaya ai dil
tu ubhare jo ham ko pasti se
tujh ko yarab nahin koi mushkil
haa.e jo baat bhi kahi main ne
zer-e-lab tu ne kah diya mohmil
kya bharosa karen kisi pe ‘naresh’
aadmi aadmi ka hai qatil
Leave a Reply