apne ji men jo Thaan lenge aap
ya hamara bayan lenge aap
justuju qa.ede ki ho varna
dar-ba-dar ḳhaak chhan lenge aap
ahd-e-hazir ke baad aa.ega
vo zamana ki jaan lenge aap
yuun to ghussa haram hai lekin
roz jab imtihan lenge aap
aap ko mehrban samajhte hain
aur kya naak kaan lenge aap
saaf kahiye ki chahte kya hain
kya gharibon ki jaan lenge aap
ye harifan-e-kam-nazar ai ‘shad’
mujh ko ik roz maan lenge aap
Leave a Reply