dil-e-shikasta harif-e-shabab ho na saka
ye jam-e-zarf navaz-e-sharab ho na saka
kuchh aise rahm ke qabil the ibtida hi se ham
ki un se bhi sitam-e-be-hisab ho na saka
nazar na aaya kabhi shab ko un ka jalva-e-rukh
ye aftab kabhi mahtab ho na saka
nigah-e-faiz se mahrum bartari maalum
sitara chamka magar aftab ho na saka
hai jaam khali to phiki hai chandni kaisi
ye sail-e-nur sitam hai sharab ho na saka
ye mai chhalak ke bhi us husn ko pahunch na saki
ye phuul ghul ke bhi us ka shabab ho na saka
kisi ki shokh-navai ka hosh tha kis ko
main na-tavan to harif-e-khitab ho na saka
huun tere vasl se mayus is qadar goya
kabhi jahan men koi kamyab ho na saka
vo puchhte hain tire dil ki aarzu kya hai
ye khvab haae kabhi mera khvab ho na saka
talash-e-maani-e-hasti men falsafa na khirad
ye raaz aaj talak be-hijab ho na saka
sharab-e-ishq men aisi kashish si thi ‘akhtar’
ki laakh zabt kiya ijtinab ho na saka
Leave a Reply