Nazar Nichi Hai Yar-E-KHush-Nazar Ki

nazar nīchī hai yār-e-ḳhush-nazar kī

karāmat hai ye merī chashm-e-tar kī

mubārak tujh ko ai sarv-e-ḳhirāmāñ

javānī dhuup jaise dopahar kī

usī ko lutf aayā zindagī kā

junūñ meñ zindagī jis ne basar kī

yahāñ parvāz ke ādāb sīkho

asīrī tarbiyat hai bāl-o-par kī

safar kaTtā hai akasr be-ḳhudī meñ

adā.eñ yaad haiñ ik ham-safar kī

ḳhushā ai soz-e-ġham terī badaulat

duāoñ par ināyat hai asar kī

vo ḳhush haiñ ‘vajd’ arz-e-hāl kar le

yahāñ fursat nahīñ arz-e-hunar kī

Leave a Comment