chashm-nam jan-e-shorida kaafi nahin
tohmat-e-ishq-e-poshida kaafi nahin
aaj bazar men pa-ba-jaulan chalo
dast-afshan chalo mast o raqsan chalo
khak-bar-sar chalo khun-ba-daman chalo
raah takta hai sab shahr-e-janan chalo
hakim-e-shahr bhi majma-e-am bhi
tir-e-ilzam bhi sang-e-dushnam bhi
subh-e-nashad bhi roz-e-nakam bhi
un ka dam-saz apne siva kaun hai
shahr-e-janan men ab ba-safa kaun hai
dast-e-qatil ke shayan raha kaun hai
rakht-e-dil bandh lo dil-figaro chalo
phir hamin qatl ho aaen yaaro chalo