kahin sota na rah jaun sada de kar jagao na
mujhe in aath pahron se kabhi bahar bulao na
khuli ankhon se kab tak justuju ka khvab dekhunga
hijab-e-haft-parda apne chehre se uthao na
sitare par sitara ok men bahta chala aae
kisi shab kahkashan undel kar mujh ko pilao na
jo chaho to zamane ka zamana vazhgun kar do
magar pahle hudud-e-jan men hangama uthao na
subuk-dosh-e-ziyan kar diin ziyan-andeshiyan dil ki
zara asbab-e-duniya rah-e-duniya men lutao na
liye jaate hain lamhe reza reza kar ke ankhon ko
nihayat der se main muntazir baitha huun aao na
Leave a Reply