Athar Nafees
phir koi naya zaḳhm naya dard ata ho
us dil ki ḳhabar le jo tujhe bhuul chala ho
ab dil men sar-e-sham charaghan nahin hota
sho.ala tire gham ka kahin bujhne na laga ho
kab ishq kiya kis se kiya jhuuT hai yaaro
bas bhuul bhi jaao jo kabhi ham se suna ho
darvaza khula hai ki koi lauT na jaa.e
aur us ke liye jo kabhi aaya na gaya ho
shayad ki tire qurb se aa jaa.e mayassar
vo dard ki jo dard-e-juda.i se siva ho
ab meri ghazal ka bhi taqaza hai ye tujh se
andaz-o-ada ka koi uslub naya ho
Leave a Reply